Central Magnetizm eftir Subterranean komin á Spotify

Enska

Tæp 20 ár eru liðin frá því að hljómsveitin Subterranean gaf út sína fyrstu breiðskífu, Central Magnetizm, en eins og fram kom í tilkynningu frá Alda Music í gær er platan nú aðgengileg á Spotify. 

Platan kom út stuttu eftir að hljómsveitin Quarashi gaf út samnefnda plötu (sem var einnig fyrsta plata sveitarinnar) og líkt og Árni Matthíasson ritar í Morgunblaðinu við útgáfu Central Magnetizm ríkti mikill áhugi á rapptónlist á þessum tíma:

„GRÍÐARLEGUR áhugi á rappi á Íslandi hlaut að skila sér í útgáfu og skammt stórra högga á milli, því varla er Quarashi búin að senda frá sér fyrirtaks breiðskífu en Subterranean kveður sér hljóðs með annarri frábærri. Þessar sveitir eiga þó fátt sameiginlegi annað en að leika rappkyns tónlist, því á meðan Quarashi- liðar þræða einstigið milli rapps og rokks, vel kryddað af breakbeat, fer Subterranean í rætur rappsins og bregður fyrir sig rytmablús og djassi þegar við á. Grunnurinn er þó hreinræktað rapp, svo hreinræktað reyndar að vísast eiga margir eftir að reka upp stór augu þegar þeir heyra hversu öfluga skífu þeirrar gerðar má gera hér uppi á Íslandi.“ 

– Árni Matthíasson (mbl)

Nánar: http://www.mbl.is/greinasafn/g...

Subterranean samanstóð af fjórum röppurum: Karli Davíðssyni, Magnúsi Jónssyni (Magse), Rögnu Magnúsdóttur (Cell 7) og Frew Elfineh (Black Fist). Lög og texta plötunnar sömdu meðlimir sveitarinnar sjálfir. Óttar Sæmundsen lék á bassa og Pétur Þór Benediktsson á gítar. Birgir "Bix" Sigurðsson sá um upptökustjórn og útsetningar.

Mælir SKE sérstaklega með laginu My Style Is Phreaky en lagið er löngu orðið sígilt. Áhugavert er að rýna í fyrrnefnda gagnrýni Árna Matthíassonar þar sem hann fer að sjálfsögðu fögrum orðum um lagið – enda smekkmaður:

„Ýmis stílbrigði eru notuð til að krydda rappið og sem betur fer eru orðin í fyrirrúmi, eins og til að mynda í því lagi sem fellur best að eyrum við fyrstu hlustun, My Style is Phreaky. Þar er góð sveifla með skemmtilega hreinum hljóðum og sveitin fer hreinlega á kostum í rappi sem má telja einskonar stefnuyfirlýsingu sveitarinnar.“

– Árni Matthíasson (mbl)