Steini (Quarashi) rappar yfir Skepta í Kronik (myndband)

Kronik

Síðastliðið föstudagskvöld kíkti Steinar Albumm Fjeldsted (oftast þekktur sem Steini úr Quarashi) í útvarpsþáttinn Kronik á X-inu 977. 

Tilefni heimsóknarinnar var kynning á sérstakri "pop-up" verslun á vegum hjólabrettabúðarinnar Skugga, í samstarfi við fatamerkið X-Large, sem var sett á fót síðastliðið laugardagskvöld. 

Verslunin Skuggi mun að öllum líkindum opna á Klapparstígnum í kringum áramótin og hyggjast Steini og samstarfsfólk hans stilla upp fleiri "pop-up" verslunum í haust áður en búðin opnar dyr sínar formlega.

Að sjálfsögðu gátu umsjónarmenn Kronik ekki sleppt Steina úr hljóðverinu fyrr en hann var búinn að grípa í hljóðnemann og rifja upp gamla takta. Rappaði Steini yfir bítið That's Not Me eftir Skepta (sjá hér fyrir ofan).

Næsti þáttur Kronik fer í loftið næstkomandi föstudagskvöld á milli 18:00 og 20:00. Líklegt þykir að tvíeykið JóiPé x Króli muni kíkja við í næsta þátt þar sem þeir forfölluðust frá síðasta þætti.